شباب وبنات كوول
اهلاً بك,انت مش مسجل عندنا فممكن تسجل
وتشارك معانا في شباب وبنات كول بالمواضيع والردود الجامدة
وإنشاء الله تستمتعوا معنا في شباب وبنات كوول



 
الرئيسيةالبوابةالتسجيلدخول

شاطر | 
 

 عريس من النت الجزء التالت والاخيييير

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
eimy-angel
عضو مجتهد
عضو مجتهد
avatar

عدد الرسائل : 75
العمر : 24
تاريخ التسجيل : 16/07/2009

مُساهمةموضوع: عريس من النت الجزء التالت والاخيييير   الجمعة يوليو 31, 2009 5:09 pm

رن جرس الشقة مرة واحدة فأسرعت عفاف لفتح الباب ولكن والدها أوقفها وأخبرها أن تلزم غرفتها حتى ينادى عليها ثم فتح هو الباب ليجد شابا وسيما أنيقا ذو رائحة طيبة وإبتسامة هادئة وبيده كيس موز
استبشر حلاوة العنتبلى خيرا ودعاه للدخول ولكنه أخذ ينظر وراءه فى تعجب لعدم وجود أحد معه فأغلق الباب خلفه فى عنف وتغيرت ملامح وجهه وهو يقول: أهلاً
حاتم: أهلا بيك ياعمى
العنتبلى: خير يابنى؟
حاتم(فى قلق): هيّ الآنسة عفاف ما قالتلكوش إنى جاى؟
العنتبلى: لا قالتلنا.. بس ماقالتلناش إنك سيادتك هتشرّف لوحدك
حاتم: لا ياعمى منا مش جاى لوحدى أنا معايا كيس موز
العنتبلى: لا ياشيخ!.. كيس موز؟
الأم: ياما جاب الغراب لأمه
حاتم: طيب ياعمى ندخل فى المفيد
العنتبلى: ندخل فى المفيد!.. إنت متأكد إنك جاى تدخل فى المفيد؟
حاتم: أكيد يا عمى إمال أنا جاى ليه؟
العنتبلى: وإن شاء الله هندخل فى المفيد بطولك كده؟!.. من غير والدك ولا والدتك ولا عمك ولا خالك ولا أى حد؟
حاتم: لا لا يا عمى ماهو انتوا هتشوفوهم فى الفرح إن شاء الله
وقف العنتبلى مرة واحدة صارخا: نعم ياخويا؟!!!.. فى الفرح؟
حاتم: اتفضل بس يا عمى وأنا أفهمك على كل حاجة
العنتبلى: أدينا اتفضلنا أهو.. نعم؟
ـ أنا ياعمى اسمى حاتم وعندى 22 سنة و3 أشهر و5 أيام و4ساعات ونصف
الأم(بحدة): جرا إيه يابنى إنت؟!.. كان زمانك إتجوزت وخلفت كمان
العنتبلى: استني بس ياأم عفاف أما نشوف أخرتها
حاتم: أنا يا عمى عندى شقة واسعة والحمد لله وجاهزة عالفرش
العنتبلى: اللي بعده
حاتم: وجاى أطلب إيد الآنسة عفاف.. طبعا أنا عارف إنكم مستغربين إنى جيت لوحدى
العنتبلى: الله ينور عليك.. هو ده بقى المفيد! فين الحاج والحاجة؟
حاتم: بصراحة كدة ياعمى الحاج والحاجة مش مقنتعين بحك****** جوازى من النت دى
العنتبلى: نعم يا حبيبى؟!.. هو مين الى من النت إنت ولا إحنا؟
حاتم: إحنا الإثنين ياعمى
العنتبلى: يابنى انت هتلخبطنى ليه بقى؟!.. أنا جزار مش صحفى
حاتم: وفيها إيه يا عمى طيب ما أنا طالب مش صحفى
العنتبلى(صارخا): مش صحفى؟!!.. وكمان طالب
الأم: إمال إنت فاكر إيه يا حاج ماهو طالب فى البتاعة دى الى بيشتغلوا فيها على الكبورر
العنتبلى: خشى يا وليّه نادي على عفاف
*******
أتت عفاف بسرعة ووالدها يرمقها بغضب بينما ابتسم حاتم وهو يقول: أهلا يا آنسة عفاف
عفاف: أهلا بيك يا أستاذ حاتم
العنتبلى: اقعدى ياعفاف شوفى المصيبة دى
عفاف: مصيبة إيه بس يا بابا كفا الله الشر؟
العنتبلى: البيه بيقولى إنه طالب
عفاف: أيوة يا بابا ماهو طالب فى هندسة الحاسبات فى آخر سنة
العنتبلى: نعم ياختى؟!.. أنا كنت فاكره صحفى
حاتم: صحفى؟!.. بس أنا عمرى ماكنت صحفى ولا هكون
عفاف: استنى بس يا حاتم لو سمحت.. يظهر إن فى سوء تفاهم وفاكرينك صحفى عشان أنا قلتلهم إنك بتكتب فى المنتديات
ثم إلتفتت إلى والدها وهى تقول: يا بابا الأستاذ حاتم بيكتب عالنت مش فى الصحافة! وكتاباته مميزة جدا
العنتبلى: ماانا عارف إنه بيكتب فى الجرنال وبعدين يدخل الجرنال فى الشاشة عشان الناس تشوفه عالنت.. انتوا فاكرينى جاهل ولا إيه؟
حاتم: لا ياعمى العفو
عفاف: يابابا فى جرنال فى الدنيا بيدخل فى الشاشة؟!.. مين الى قالك كده؟
العنتبلى: واحد صاحبى متعلم ومتنور ومعاه تالتة إبتدائى!.. قالي إن الأخبار الى بتشوفوها عالنت عبارة عن جرايد بيدخلوها من فتحات الشاشة الى ورا
عفاف: تالتة إبتدائى؟!.. يا بابا الكلام ده غلط ومافيش جرايد بتدخل من الشاشة ولا حاجة.. بالنسبة للأخبار دى عبارة عن كلام مطبوع عالنت
العنتبلى: شوفى يا بنتى إنتى وهو.. لو فضلتم سنة تتكلموا عن النت ده مش هفهم برضه! المهم دلوقتى بسلامته والدك مش موافق ليه؟
إحنا مش قد المقام ولا يعنى ما نشبهشى؟
حاتم: لا ياعمى العفو ده شرف ليهم إنهم يناسبوا حضرتك وطنط
الأم: طنط؟!!!.. طنط مين يا ضنايا؟
عفاف: اهدى يا ماما.. هو يقصد إنه يحترمك مش أكتر
حاتم: أيوة طبعا زى ما قالت عفاف كده بالضبط
الأم: بس معلشى يابنى لا طنط ولا مدموزيل قولى يا حاجّة أحسن
حاتم: حاضر يا حاجّة
العنتبلى: طيب لما هو شرف ليهم مش موافقين ليه؟
عفاف: هو يقصد يابابا إنهم مش موافقين على الطريقة نفسها.. يعنى الزواج عن طريق النت
العنتبلى: طب ليه يا بنتى مش ده جواز على سنة الله ورسوله؟
حاتم: أكيد يا عمى بس تقول إيه بقى ربنا يهديهم
العنتبلى: طب ممكن تقولى بقى إزاى عجبتك بنتى من غير ما تشوفها.. يعنى إنت أصلا جاى بناءاً على إيه؟
نظر حاتم إلى عفاف وهو يقول: عجبتنى مشاركاتها ياعمى!.. مواضيعها وردودها.. قابلتها أول مرة فى موضوع عن السجاير! كلامها لفت نظرى ولقيتها مرة واحدة مشاركة فى موضوع ليا عن الكورة وأقنعتنى بكلامها إن الكورة دى للفاضيين ومش ممكن واحد مسلم يشعر بإخوانه فى العراق وفلسطين يقعد يكتب موضوع عن الكورة ويشجع الأهلى
العنتبلى: اخص عليكى يا عفاف! خلتيه يشجع الزمالك بدل الأهلى؟
حاتم: لا ياعمى هى خليتنى أسيب الكورة نهائى وأشجع الوحدة الإسلامية!.. بعد ما إقتنعت بكلامها طلبت من الموديراتور إنه يقفل الموضوع.. و
قاطعه العنتبلى: طلبت من مين ياخويا؟
حاتم: الموديراتور
العنتبلى: ويطلع إيه الموتور ده كمان؟
عفاف: يقصد المشرف يا بابا.. يعنى الى بينظّم المكان
العنتبلى: طيب
حاتم: المهم.. بدأت أعجب بيها وأتابع مشاركاتها ومشيت وراها فى كل موضوع تروحه! خرجت من س****** الشباب للمنتدى السياسى خرجت وراها لقيتها شاركت فى موضوع عن بوش وشارون شاركت معاها وشكرتها على مشاركتها ونسيت أشكر صاحب الموضوع الأصلى! رغم انها أصلا كانت داخلة تشكره فشكلى كان نيلة ساعتها! ولقيتها سابت السياسة وراحت لروضة الأخوات فى موضوع تعارف وأنا كنت ماشى وراها كالمسحور فشاركت بعد مشاركتها على طول رغم إن الموضوع للأخوات فقط ومأخذتش بالى إلا لما المشرف وقفنى! وعلى ما سجلت بإسم جديد مؤقتا لقيتها فى المنتدى العام بتشارك فى موضوع للنكت فقلت فرصة أكتبلها نكتتين يضحكوها قبل ما تشارك هى وفعلا كتبت نكت جامدة قوى وقلت أكيد هتضحك لقيتها كاتبة عتاب طويل عريض لصاحب الموضوع إن النكت دى ما يصحش تتقال فى منتدى إسلامى وبتنصحه إنه يشيل الموضوع ويراجع نيته
لقيتها دخلت موضوع شمس وقمر قلت أهو فرصة نلعب سوا! فدخلت قلت شمس قبل ما هى تقول قمر واستنيتها كتير تقول قمر بدون فايدة فقلت لنفسى معقولة ده كله بتكتب ثلاث حروف؟! ولا يمكن بترسملهم القمر ذات نفسه
المهم بعد 5 دقائق لقيتها رازعة صاحب الموضوع كلمتين عن المشاركات الهادفة والجد ومراعاة ظروف المسلمين المعتقلين والمعذبين والمقتولين لغ****** ما نفسى غمت عليا! فسحبت كلمة شمس وكتبت بدالها تحيا الوحدة الإسلامية.. وقلت البنت دى لازم تبقى من نصيبى لأنها إيجابية جدا ومحترمة جدا فطلبت إيميلها من المشرف قالى ممنوع! حاولت أقنعه وقلتله ياعم يرضيك يرضيك مافيش فايدة



*******
طبعا الأب والأم قاعدين مسبهلين ومش فاهمين أى حاجة ويستمعون لحاتم ويؤئمون برؤوسهم كأنهم يفهمون! ولكن عفاف كانت تبتسم وقالت: إمال عرفت إيميلى إزاى؟
حاتم: قدرا!.. لقيتك كاتباه لواحدة صحبتك فأخذته على طول
الأب: إحنا إن شاء الله مش هنخلص النهاردة؟
حاتم: أنا آسف يا عمى.. حضرتك موافق طبعا؟
الأم: يوافق على إيه يا جدع إنت هو سلق بيض؟
الأب: انت عاوزنى أوافق على إيه هو انت قلت حاجة أوافق عليها؟
حاتم: طبعا ياعمى على عرضى للزواج من كريمتكم عفاف
الأب: انت فاكر اننا هنقبلك كدة بطولك؟!.. من غير ما والدك ووالدتك يوافقوا ونتفاهم عالتفاصيل
حاتم: وفيها إيه ياعمى بس هو مش أنا الى هتجوز ولا هما؟
الأب(وقد فاض به الكيل): اسمع ياد إنت!.. بقى أنا صابر عليك من الصبح وإنت عمّال تحكيلى قصة حياتك كأنك صلاح الدين! وبعدين عمّال تقولى كنت بجرى ورا البت عالنت من موضوع لموضوع لغ****** ما قطعت نفسى وجت اتقدمتلها.. نيجى بقى للمفيد.. إذا كنت فاكر إنك هتضحك علينا بالخمسة كيلو موز دول فانت غلطان ده أنا ممكن أزحلقك بيهم دلوقتى!.. لو عاوز تخطب عفاف فعلا هاتلى أبوك وأمك عشان نتفاهم غير كده قضيها مواضيع عالنت أحسنلك.. أما عفاف فأهى قاعدة معانا أهى بتاكل وبتشرب ولو ما نفعتشى فى الجواز ممكن ندبحها عالعيد مافيش أى مشاكل
عفاف: يا بابا بس 000
قاطعها العنتبلى: اخرسى يا بت إنتى وخشى جوه
حاتم: ماهو ياعمى أنا كنت ناوى
قاطعه العنتبلى بدوره: ناوى إيه بقى؟!.. بقالك نص ساعة ناوى ؟!.. على ما تعمل حاجة هيكون اليوم خلص.. أنا خلصت اللى عندى روح شاور أهلك والمرة الج****** لو فيه يعنى هاتهم معاك
حاتم: طب يا عمى ممكن000
قاطعه العنتبلى مرة أخرى: بقولك إيه؟! فى جاموسة هنروح ندبحها كمان شوية لو أخرتنى ممكن أ00000
حاتم(مذعورا): لا يا عمى على إيه.. سلام عليكم
العنتبلى: وعليكم السلام يا سى طالب أفندى.. قال عريس من النت قال.. شوية شوية تجيبيلى عريس من الإنترنت..... lol! lol!
الرجوع الى أعلى الصفحة اذهب الى الأسفل
 
عريس من النت الجزء التالت والاخيييير
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شباب وبنات كوول :: المنتديات العامة :: المنتدى العام-
انتقل الى: